About admin1

Helderberg Uitreik (Droogtehulp)

Helderberg Uitreik staan droogtegeteisterde gemeenskappe by

Op ’n dag toe die kwik by 44 ˚C gaan draai het op Merweville, het ds. Hannes Theron van Helderberg Gemeente en Pia Nänny van Helderberg Uitreik se Rampverligtingprojek ongeveer 60 Adventsbokse by die kerkkantoor op dié dorp gaan aflewer. Hierdie bokse met kruideniers- en toiletware is met liefde oor die Kerstyd deur Helderberg- en Moedergemeentelede saamgestel. Dit is vanuit die kerkkantoor in Merweville, 128 km duskant Laingsburg, na die plaasgemeenskap versprei.  Dit was die warmste dag wat hy nog op Merweville beleef het, het ds Herman Burger gesê. Die veld is dor en vaal. Hy het gevra dat ons die gemeenskap se dank aan die gemeentelede van Helderberg Gemeente en Somerset-Wes Moedergemeente sal oordra en dat ons sal aanhou bid dat die boere nie moed sal verloor nie.  “Mense wat al 40 jaar hier boer, sê hulle het dit nog nooit so beleef nie,” vertel hy. “Daarom wil ons net baie dankie sê vir wat julle doen. Elke bietjie help. Ons moet ook onthou dat gebed ’n kragtige uitwerking het.”

Sien ook Droogtehulp.

Rekeninge betaal

Die Rampverligtingprojek het in Desember die agterstallige kosrekeninge van agt boere in die Noord-Kaap by hul plaaslike winkel betaal en voorskotte inbetaal op 19 rekeninge van boere wat swaarkry weens droogte. Die plaaslike tehuis vir bejaardes is ook ondersteun.  Ons het hierdie wonderlike boodskap ontvang: “Hoe sê ’n mens dankie vir wat julle as gemeente vir ons boere doen? Ek kry vanoggend ’n boodskap van die plaaslike winkel dat ons rekening vereffen is. Ek sit al maande en worstel oor hoe ek die fondse bymekaar kan kry om my rekening te betaal sodat ek ook vir ’n slag my gesig in die winkel kan wys en nie skaam is om daar in te loop nie. Dankie dat julle my menswaardigheid so help herstel het. Ek weet nie hoe om julle te bedank vir dit wat julle vir my en soveel ander boere gedoen het nie.”

Planne vir 2020

Die projek het hierdie week die agterstallige koshuisgelde van ses leerders van Hoërskool Vredendal betaal. Van die 74 koshuisinwoners by dié skool, is 53 leerders afkomstig uit die droogtegeteisterde Noord-Kaap. Deur die las van skoolgelde te verlig, sal ouers minder waarskynlik agterstallig raak en kan die geld ook vir ander noodsaaklikhede soos voer, diesel en kos gebruik word. Ons beplan om, soos verlede jaar, weer bederfpakkies vir koshuisleerders te pak. Ons wil graag die volgende items by die bederfpakkie insluit:

  • Pakkie beskuit (Het jy ‘n lekker beskuitresep waarmee jy koshuisleerders uit droogte-geteisterde gebiede wil bederf? Ons wil graag hoor of daar mense is wat bereid sal wees om beskuit te bak en te verpak in pakkies van ongeveer 500g)
  • Boksie cappuccino- / warmsjokolade- / 3-1-koffiesakkies
  • Pakkie koekies
  • Pakkie lekkers/sjokolade
  • Koekie seep
  • Tandepasta en tandeborsel
  • ’n Kleurmerker (highlighter) en ’n pen-en-potloodstel
  • Seuns: Klein houer skeerroom, skeermes
  • Meisies: Clicks se 3-for-2-aanbieding: stortseep, lyfroom, sjampoe. Pakkie sanitêre ware.

Bydraes kan by Moedergemeente of Helderberg gemeente se kerkkantoor afgelewer word. Finansiële bydraes kan by Helderberg Uitreik, ABSA Helderberg, # 911 4483 080 (spaar) inbetaal word, met die beskrywing BEDERFPAKKIE of DROOGTEHULP. Bydraes kwalifiseer vir Art 18A-kwitansies. Stuur asb bewys van betaling na louise@nghelder.co.za en vra vir Art 18A.